89–104
Metáfora Tetun Leno Ita Nia Moris
Authors: Catharina Williams-van Klinken
Number of views: 8
Tuir Lakoff ho Johnson (2003), ita kompriende buat barak liuhosi metáfora, liuliu ita kompriende buat ne’ebé ita la bele haree bazeia ba buat fíziku. Iha metáfora, ita uza liafuan ne’ebé baibain hatudu ba buat ida hodi hatudu ba buat seluk fali, ne’e katak, ita halo komparasaun. Ezemplu, ita kompara Maromak ho aman ida. Maibé ita la esplika komparasaun ne’e. Ema ne’ebé rona mak tenke interpreta, oinsá mak buat rua ne’e hanesan. Ida ne’e halo metáfora sai forte, maibé mós perigozu uitoan, tanba ita ida-ida interpreta tuir ita-nia esperiénsia ho ita-nia kultura. Metáfora sempre leno realidade nia aspektu balu, no subar aspektu seluk. Ezemplu, ita kompara justisa modernu ho funu (defende arguidu, nia lakon), maibé ida ne’e bele halo ita haluha katak ita bele mós rezolve problema liuhosi diálogu. Ita ko’alia loroloron uza metáfora barak. Maski ita baibain la nota, maibé metáfora sira-ne’e hatudu buat barak kona ba ita nia ideia.